დროის ფასი უიმბლდონზე

ტურნირის ყველაზე ძვირადღირებული საათები

21.11.25

უიმბლდონი ცნობილია თავისი მკაცრი ტრადიციებითა და სავალდებულო თეთრი დრესკოდით, თუმცა სტუმრებმა და სპორტსმენებმა თავიანთი ინდივიდუალიზმის გამოხატვა მაინც შეძლეს. ამჯერად, აქცენტი მაჯის საათებზე გაკეთდა. ინგლისური ტურნირის დასრულების შემდეგ, მოდის კრიტიკოსებისა და გულშემატკივრების ყურადღება იმ ძვირადღირებულმა აქსესუარებმა მიიპყრო, რომლებიც ჩემპიონებისა და VIP ლოჟის სტუმრების მაჯებს ამშვენებდა. 

სტატიაში გთავაზობთ ტურნირის ყველაზე გამორჩეულ საათებს.

იანიკ სინერი (Jannik Sinner) 

მას შემდეგ, რაც მან ტიტულის მოქმედი მფლობელი, კარლოს ალკარასი (Carlos Alcaraz) დაამარცხა და უიმბლდონის პირველი ტიტული მოიპოვა, იანიკ სინერმა ჯილდო მაჯაზე Rolex Daytona Sundust-ით აღმართა. ეს მოდელი, რომელიც Everose ოქროს კორპუსით, ვარდისფერი ციფერბლატითა და შავი ქვეციფერბლატებით გამოირჩევა, დაახლოებით 39,300 აშშ დოლარად არის შეფასებული.

დევიდ ბექჰემი (David Beckham) 

დევიდ ბექჰემმა არჩევანი შეაჩერა Tudor Black Bay Chrono-ზე, რომელიც წელს, 50 წლის იუბილეზე მიიღო. ეს უნიკალური მოდელი განსაკუთრებული დეტალებით გამოირჩევა: მისი ბეზელი და საათის ინდექსები ბრილიანტებითაა გაწყობილი. მიუხედავად იმისა, რომ ბექჰემის პერსონალიზებული საათის ფასი უცნობია, ამ მოდელის სტანდარტული ვერსიის ღირებულება 6,050 დოლარს შეადგენს.

მირკა ფედერერი (Mirka Federer) 

ყოფილმა ჩოგბურთელმა და რვაგზის ჩემპიონის, როჯერ ფედერერის (Roger Federer) მეუღლემ, მირკა ფედერერმა კიდევ ერთხელ დაამტკიცა, რომ საათების გამორჩეული კოლექციონერია. მას ეკეთა პლატინის Rolex Day-Date, რომლის ბეზელი ზურმუხტებით, ხოლო ციფერბლატი სრულად ბრილიანტებით იყო დაფარული. ეს Rolex-ის ერთ-ერთი ყველაზე ექსკლუზიური ქმნილებაა და მისი ღირებულება დაახლოებით 800,000 დოლარს აღწევს.

ლეონარდო დიკაპრიო (Leonardo DiCaprio) 

ჰოლივუდის ვარსკვლავი უიმბლდონზე ახლახან გამოსული Rolex Land-Dweller-ით გამოჩნდა. ეს 40 მმ-იანი მოდელი, რომელიც Oystersteel-ისა და თეთრი ოქროს კომბინაციითაა შექმნილი, გამოირჩევა თეთრი ფიჭისებრი ციფერბლატითა და ინტეგრირებული ბრტყელი Jubilee სამაჯურით. განსაკუთრებულ ყურადღებას იმსახურებს მისი ინოვაციური მექანიზმი Dynapulse, რომელიც საათების ტექნოლოგიაში მნიშვნელოვან წინსვლად მიიჩნევა.

ედი რედმეინი (Eddie Redmayne) 

ფილმ The Danish Girl-ის ვარსკვლავი და შვეიცარიული ბრენდის Omega-ს ელჩი, ედი რედმეინი ტურნირზე Omega Seamaster Aqua Terra-თი წარსდგა — მოდელით, რომლის სარეკლამო კამპანიაშიც თავად მონაწილეობდა. ბრენდის ვებგვერდის მიხედვით, ამ საათის ფასი 7,000 დოლარია.

ელენა ჯოკოვიჩი (Jelena Djokovic) 

ნოვაკ ჯოკოვიჩის (Novak Djokovic) მეუღლე, ელენა ჯოკოვიჩი, ნახევარფინალში ქმრის საგულშემატკივროდ Audemars Piguet Royal Oak Double Balance Wheel Openworked-ით მივიდა. 2024 წლის ეს მოდელი ვარდისფერი ოქროს კორპუსითა და ღია მექანიზმით გამოირჩევა, რომელსაც იასამნისფერი რკალი აკრავს. 

ნიკ ჯონასი (Nick Jonas)

ბროდვეის ვარსკვლავი ნიკ ჯონასი მეუღლესთან, პრიანკა ჩოპრასთან (Priyanka Chopra) ერთად გამოჩნდა და ვინტაჟური ოქროს Rolex Day-Date მოირგო, რომელიც ბრილიანტის დეტალებით იყო გაფორმებული. ამ მოდელის თანამედროვე ანალოგის, ყვითელი ოქროსა და ბრილიანტების კომბინაციის ფასი Rolex-ის საიტზე 102,750 დოლარია.

ენდრიუ გარფილდი (Andrew Garfield)

Ralph Lauren-ის სამოსში გამოწყობილმა მსახიობმა, ენდრიუ გარფილდმა, არჩევანი Omega De Ville Trésor-ზე შეაჩერა. ეს ფოლადის საათი შავი ტყავის სამაჯურით, ხაზს უსვამდა მის ელეგანტურ სტილს. გარფილდი ბრენდის ელჩია და ხშირად ატარებს Omega-ს საათებს.

ტომ ჰოლანდი (Tom Holland) 

„ადამიანმა-ობობამ“, ტომ ჰოლანდმა პლატინის Rolex Cosmograph Daytona მოირგო. 2023 წელს წარმოდგენილი ეს მოდელი გამოირჩევა ყინულოვანი ლურჯი ციფერბლატით — ფერი, რომელსაც Rolex მხოლოდ პლატინის მოდელებისთვის იყენებს. ჰოლანდის საათი განსაკუთრებულია ბრილიანტის ინდექსებით (ნაცვლად სტანდარტული მარკერებისა) და წითელი წარწერით Daytona, რაც მას კოლექციონერებისთვის სასურველ ნივთად აქცევს.

რასელ ქროუ (Russell Crowe) 

ოსკაროსანმა მსახიობმა რასელ ქროუმ ყურადღება მიიპყრო მკვეთრი ფერის Rolex Cosmograph Daytona-თი, რომელსაც ხშირად Tiffany Daytona-ს უწოდებენ მისი ფირუზისფერი ციფერბლატის გამო. 18-კარატიანი ყვითელი ოქროს კორპუსი, შავი კერამიკული ბეზელი და Oysterflex-ის სპორტული სამაჯური კომფორტისა და ფუფუნების იდეალურ ნაზავს წარმოადგენს.